थॅलेसेमिया आजारावर मोफत उपचारासाठी आयुष्यमान भारत योजनेत समावेश करावा — रिपब्लिकन पार्टी ऑफ महाराष्ट्रतर्फे निवेदन

 

वृत्तरत्न नव महाराष्ट्र न्यूज✍🏻

 कार्यकारी संपादक : रितेश साबळे

छत्रपती संभाजीनगर (दि. 10 ऑक्टोबर 2025) — थॅलेसेमिया या गंभीर आनुवंशिक रक्तविकारावर मोफत उपचाराची सुविधा मिळावी आणि हा आजार आयुष्यमान भारत जन आरोग्य योजनेत समाविष्ट करावा, या मागणीसाठी आज रिपब्लिकन पार्टी ऑफ महाराष्ट्र तर्फे आयुष्यमान भारत मिशन महाराष्ट्रचे प्रमुख डॉ. ओमप्रकाश शेटे यांना निवेदन सादर करण्यात आले.

ही बैठक जिल्हाधिकारी कार्यालय, छत्रपती संभाजीनगर येथे पार पडली. या वेळी जिल्हाधिकारी, तसेच जिल्ह्यातील सर्व शासकीय व निमशासकीय रुग्णालयांचे प्रमुख डॉक्टर उपस्थित होते. बैठकीचे अध्यक्षस्थान डॉ. ओमप्रकाश शेटे यांनी भूषविले.

सध्या शासनाच्या महात्मा ज्योतीराव फुले जन आरोग्य योजना (MJPJAY) आणि आयुष्यमान भारत – प्रधानमंत्री जन आरोग्य योजना (AB-PMJAY) या योजनांतर्गत विशिष्ट आजारांवर रोखरहित (Cashless) उपचाराची सुविधा उपलब्ध आहे. मात्र थॅलेसेमिया या आजाराचा यात समावेश नसल्याने रुग्ण आणि त्यांच्या कुटुंबियांना मोठ्या अडचणींना सामोरे जावे लागत आहे.

थॅलेसेमिया — एक गंभीर आनुवंशिक आजार:

थॅलेसेमिया हा जनुकांद्वारे होणारा रक्तविकार आहे. यात शरीरात हिमोग्लोबिनचे उत्पादन योग्य प्रमाणात होत नाही, ज्यामुळे रक्ताची कमतरता निर्माण होते. या आजाराचे दोन मुख्य प्रकार आहेत — थॅलेसेमिया मायनर (सौम्य प्रकार) आणि थॅलेसेमिया मेजर (गंभीर प्रकार). थॅलेसेमिया मेजर असलेल्या रुग्णांना वारंवार रक्त संक्रमण (Blood Transfusion) करण्याची गरज भासते.

आजाराची प्रमुख लक्षणे:

तीव्र थकवा, अशक्तपणा आणि फिक्कट/पिवळी त्वचा

मुलांची वाढ खुंटणे व विकासात उशीर

ओटीपोटाला सूज (यकृत व प्लीहा वाढणे)

हाडांच्या विकृती, वारंवार संक्रमण आणि धाप लागणे

गंभीर प्रकरणांमध्ये गडद लघवी व कावीळ

थॅलेसेमियाचे परिणाम:

वारंवार रक्त संक्रमणामुळे शरीरात लोहाचा अधिभार (Iron Overload) निर्माण होतो, ज्यामुळे हृदय, यकृत आणि इतर अवयवांना गंभीर हानी पोहोचते. त्यामुळे हृदयविकार, यकृत विकार, हाडांची झीज आणि मानसिक ताण निर्माण होतो.

प्रमुख मागण्या:

1. थॅलेसेमिया आजाराचा आयुष्यमान भारत योजनेत समावेश करावा.

2. मराठवाड्यात थॅलेसेमिया उपचार केंद्रासाठी किमान दोन रुग्णालये निश्चित करावीत.

3. नियमित रक्त संक्रमण (Regular Blood Transfusion) सुविधा पुरवावी.

4. गर्भवती महिलांसाठी HPLC रक्त तपासणी अनिवार्य करावी.

5. लोह अपसारण उपचार (Iron Chelation Therapy) मोफत उपलब्ध करावा.

6. अस्थिमज्जा प्रत्यारोपण (Bone Marrow Transplant) सुविधा उपलब्ध करावी.

7. थॅलेसेमियासाठी जीन थेरपी उपचाराची अंमलबजावणी प्रायोगिक स्तरावर सुरू करावी.

8. रुग्णालयांतील आरोग्य मित्रांना 24 तास सेवेत राहण्याचे आदेश द्यावेत.

9. थॅलेसेमिया विषयक जनजागृतीसाठी जन आरोग्य अभियान समिती स्थापन करावी.

या संदर्भात रिपब्लिकन पार्टी ऑफ महाराष्ट्रचे जिल्हाध्यक्ष दिनेश गवळे यांनी डॉ. ओमप्रकाश शेटे यांना सविस्तर निवेदन सादर केले. या वेळी मराठवाडा उपाध्यक्ष सुनील खरात, उपनेते जयनाथ बोर्डे, अशोक शिरसाठ आणि प्रदीप धनेधर आदी उपस्थित होते.

डॉ. शेटे यांनी या मागण्या योग्य असल्याचे सांगत आयुष्यमान भारत मिशनतर्फे या प्रस्तावावर गांभीर्याने विचार केला जाईल, असे आश्वासन दिले.