सिल्लोड तालुक्यात दोन शेतकऱ्यांच्या आत्महत्या; कर्जबाजारीपणा आणि आर्थिक ताणामुळे घेतला टोकाचा निर्णय

वृत्तरत्न नव महाराष्ट्र न्यूज✍🏻

कार्यकारी संपादक : रितेश साबळे .

सिल्लोड (जि. छत्रपती संभाजीनगर) – सिल्लोड तालुक्यात दोन शेतकऱ्यांनी वेगवेगळ्या घटनांमध्ये आत्महत्या केल्याची धक्कादायक माहिती समोर आली आहे. पिकांचे नुकसान, वाढती कर्जबाजारी परिस्थिती आणि आर्थिक ताण यामुळे हे दोघे शेतकरी शेवटचा निर्णय घेतल्याचे प्राथमिक तपासातून समोर आले आहे. या दोन्ही घटनांमुळे सिल्लोड तालुक्यात हळहळ व्यक्त केली जात आहे.

पहिली घटना : सावखेडा खुर्द येथील शेतकऱ्याने घेतला गळफास

सिल्लोड तालुक्यातील सावखेडा खुर्द येथील देविदास शामराव सोन्ने (वय ३८) या शेतकऱ्याने शुक्रवारी (दि. २६ सप्टेंबर) सायंकाळी घरात गळफास घेऊन आत्महत्या केली. कर्जाच्या ओझ्याने व ताणतणावाने कंटाळून त्यांनी हा निर्णय घेतल्याची शक्यता व्यक्त केली जात आहे. घटनेनंतर त्यांना तातडीने सिल्लोड उपजिल्हा रुग्णालयात हलवण्यात आले, परंतु डॉक्टरांनी तपासल्यानंतर त्यांना मृत घोषित केले.

मृत शेतकरी सोन्ने यांच्या मागे आई, पत्नी, एक मुलगा आणि एक मुलगी असा परिवार आहे. त्यांच्या मृत्यूने सावखेडा खुर्द गावात शोककळा पसरली आहे.

दुसरी घटना : म्हसला खुर्द येथील शेतकऱ्याने घेतले विषप्राशन

दुसऱ्या घटनेत म्हसला खुर्द येथील भाऊदास येडूबा साळुंके (वय ५५) यांनी शनिवारी (दि. २७ सप्टेंबर) मध्यरात्री विषारी औषध घेतले. तत्काळ त्यांना सिल्लोड येथील उपजिल्हा रुग्णालयात दाखल करण्यात आले, परंतु उपचारादरम्यान त्यांचा मृत्यू झाला.

साळुंके यांच्या मागे पत्नी, एक मुलगा आणि दोन मुली असा परिवार आहे. या घटनेने म्हसला खुर्द परिसरात हळहळ व्यक्त केली जात आहे.

कारणे आणि पोलिस तपास

दोन्ही शेतकरी हे कर्जबाजारी होते, पिकांचे नुकसान व आर्थिक अडचणींमुळे मानसिक तणावाखाली होते, अशी माहिती स्थानिकांकडून मिळाली आहे. ग्रामीण पोलिस ठाण्यात या दोन्ही घटनांची स्वतंत्रपणे नोंद करण्यात आली असून, पुढील तपास बिट जमादार विष्णू कोल्हे आणि कडुबा भाग्यवंत हे करत आहेत.

परिसरात शोककळा आणि मागणी

या दुर्दैवी घटनांमुळे सिल्लोड तालुका शोकमग्न झाला आहे. शेतकरी संघटनांनी सरकारकडे मागणी केली आहे की, कर्जमाफी, तात्काळ आर्थिक मदत आणि शेतकऱ्यांसाठी मानसिक आरोग्य सहाय्य यंत्रणा उभारण्यात यावी. ग्रामीण भागातील सतत वाढणारा आत्महत्यांचा दर हा प्रशासनासाठी गंभीर इशारा असल्याचे मत स्थानिकांनी व्यक्त केले आहे.