तक्रार देण्यासाठी गेलेल्या तरुणीवर अत्याचाराचा आरोप; पोलीस अधिकाऱ्यावर गुन्हा दाखल.

वृत्तरत्न नव महाराष्ट्र न्यूज

कार्यकारी संपादक रितेश साबळे

छत्रपती संभाजीनगर : शहरातील पोलीस दलात कार्यरत असलेल्या एका अधिकाऱ्यावर २३ वर्षीय तरुणीवर शारीरिक अत्याचार केल्याचा गंभीर आरोप करण्यात आला आहे. या प्रकरणामुळे पोलीस विभागात खळबळ उडाली असून संबंधित अधिकाऱ्याविरुद्ध गुन्हा नोंदविण्यात आला आहे.

मिळालेल्या माहितीनुसार, पीडित तरुणी काही वैयक्तिक कारणास्तव तक्रार देण्यासाठी पोलीस ठाण्यात गेली होती. त्या वेळी संबंधित पोलीस उपनिरीक्षकाने मदतीचे आश्वासन देत तिच्याशी ओळख वाढवली. पुढे विश्वास संपादन करून वेळोवेळी शारीरिक संबंध प्रस्थापित केल्याचा आरोप तरुणीने केला आहे. तसेच लग्नाचे आमिष दाखवून फसवणूक केल्याची तक्रारही तिने नोंदवली आहे.

या प्रकरणात आरोपी म्हणून नाव समोर आलेले अधिकारी म्हणजे सुभाष चव्हाण असून, त्यांच्या विरोधात संबंधित कलमान्वये गुन्हा दाखल करण्यात आला आहे. तरुणीच्या म्हणण्यानुसार, या संबंधातून तिला तीन वेळा गर्भपात करावा लागला. मानसिक आणि शारीरिक छळ झाल्याचेही तिने तक्रारीत नमूद केले आहे.

घटनेची माहिती समोर आल्यानंतर वरिष्ठ अधिकाऱ्यांनी तातडीने चौकशीचे आदेश दिले आहेत. तपास निष्पक्षपणे होईल, तसेच दोषी आढळल्यास कडक कारवाई केली जाईल, असे पोलीस प्रशासनाकडून सांगण्यात आले आहे.

दरम्यान, या घटनेमुळे पोलीस दलाच्या प्रतिमेवर प्रश्नचिन्ह उपस्थित झाले असून नागरिकांमध्ये संतापाची भावना व्यक्त होत आहे. पुढील तपास सुरू असून अधिकृत निवेदनाची प्रतीक्षा आहे.