संभाजीनगर महानगरपालिकेत भाजपची सत्ता; समीर राजूरकर महापौरपदी विराजमान.

 

वृत्तरत्न नव महाराष्ट्र न्यूज

कार्यकारी संपादक : रितेश साबळे

छत्रपती संभाजीनगर महानगरपालिकेच्या महापौरपदाच्या निवडणुकीत भाजपचे समीर सुभाष राजूरकर यांनी विजय मिळवत शहराच्या राजकारणात नवे समीकरण निर्माण केले आहे. 115 सदस्यीय सभागृहात झालेल्या मतदानात राजूरकर यांना बहुमताचा कौल मिळाला. त्यांच्या विजयामुळे महापालिकेत भाजपची भूमिका अधिक बळकट झाली आहे.

महापौर निवडणुकीत विरोधी बाजूने AIMIM कडून उमेदवारी देण्यात आली होती. मात्र बहुमत भाजपच्या बाजूने झुकल्याने राजूरकर यांचा विजय निश्चित झाला. काही पक्षांनी तटस्थ भूमिका घेतल्याने निवडणुकीत वेगळे राजकीय चित्र पाहायला मिळाले.

दरम्यान, उपमहापौरपदी राजेंद्र हिम्मत्राव जंजाळ यांची निवड झाली. या निवडीमुळे सत्तासमीकरणात नवे संतुलन निर्माण झाले असून आगामी काळात महापालिकेतील निर्णयप्रक्रियेत त्याचा प्रभाव दिसून येण्याची शक्यता आहे.

निवडीनंतर महापौर समीर राजूरकर यांनी शहरातील पाणीपुरवठा, स्वच्छता आणि कचरा व्यवस्थापन या मूलभूत प्रश्नांवर प्राधान्याने काम करण्याचा संकल्प व्यक्त केला. “नागरिकांच्या दैनंदिन अडचणी दूर करून विकासाभिमुख कामकाजाला गती देणार,” असे त्यांनी स्पष्ट केले. विशेषतः 24 तास पाणीपुरवठा योजना आणि शहर स्वच्छतेच्या उपक्रमांना चालना देण्यावर भर दिला जाणार असल्याचे त्यांनी सांगितले.

छत्रपती संभाजीनगर महानगरपालिकेतील ही सत्ता बदलाची घडामोड आगामी स्थानिक राजकारणासाठी महत्त्वाची मानली जात आहे. शहराच्या विकासाच्या दृष्टीने नव्या नेतृत्वाकडून नागरिकांना मोठ्या अपेक्षा आहेत.