गणपती विसर्जन मिरवणुकीसाठी छत्रपती संभाजीनगरमध्ये वाहतुकीत मोठे बदल.

 

वृत्तरत्न नव महाराष्ट्र न्यूज ✍🏻

कार्यकारी संपादक :रितेश साबळे

छत्रपती संभाजीनगर, दि. ५ सप्टेंबर : अनंत चतुर्दशीच्या दिवशी होणाऱ्या गणेश विसर्जन मिरवणुकीदरम्यान अपेक्षित प्रचंड गर्दी लक्षात घेऊन शहर वाहतूक शाखेकडून वाहतुकीत मोठ्या प्रमाणावर बदल करण्यात आले आहेत. पोलिसांनी निर्बंध व पर्यायी मार्गांची माहिती जाहीर केली असून, हे बदल ६ सप्टेंबर रोजी मिरवणुकीदरम्यान लागू राहतील.

मुख्य मिरवणुकीचा मार्ग आणि बंद रस्ते

मुख्य मिरवणूक संस्थान गणपती ते जिल्हा परिषद मैदान या मार्गावरून जाणार आहे. या मार्गावरील संस्थान गणपती–गांधी पुतळा–सिटी चौक–गुलमंडी–बाराभाई ताजिया–बळवंत वाचनालय–एस.बी. कॉलेज–जिल्हा परिषद मैदान हा रस्ता सर्व प्रकारच्या वाहनांसाठी बंद राहील.

तसेच, शहागंज चमन, जाफर गेट, मोंढा, राजा बाजार, निजामोद्दीन चौक, लोटा कारंजा, सराफा रोड, गुलमंडी, गोमटेश मार्केट, पैठण गेट, रंगार गल्ली, सावरकर चौक, अंजली टॉकीज, बाबुराव काळे चौक आदी भागातील रस्तेही तात्पुरते बंद ठेवण्यात आले आहेत.

सिडको–हडको मिरवणूक मार्गावरील बंद रस्ते

गजानन महाराज मंदिर येथून निघणाऱ्या विसर्जन मिरवणुकीच्या मार्गावरील चिश्तिया चौक, अविष्कार चौक, बजरंग चौक, जिजाऊ चौक, चांदणे चौक, N1 चौक, सेंट्रल जकात नाका, आझाद चौक, सेव्हन हिल, त्रिमूर्ती चौक, पटीयाला बँक, जवाहरनगर पोलीस ठाणे आदी रस्ते मिरवणुकीच्या कालावधीत बंद ठेवले जाणार आहेत.

पर्यायी मार्गांची सोय

वाहतुकीसाठी पर्यायी मार्गांची व्यवस्था करण्यात आली आहे.

रोशन गेटहून शहागंजकडे जाणारी वाहतूक चेलीपुरा चौक–लोटा कारंजा–सिटी चौक मागील रस्ता वापरू शकते.

मिल कॉर्नर ते औरंगपूरा वाहतुकीसाठी नागेश्वरवाडी–निराला बाजार–समर्थ नगर–खडकेश्वर मार्ग उपलब्ध असेल.

क्रांती चौकाहून बसस्थानकाकडे जाणारी वाहतूक सिल्लेखाना चौक–समर्थ नगर चौक मार्गे जाऊ शकेल.

सिडको–हडको भागातील वाहतुकीसाठी जिल्हाधिकारी कार्यालय–गणेश कॉलनीमार्गे, हिंदू राष्ट्र चौक–विजयनगर मार्गे तसेच माणिक हॉस्पिटल–त्रिमूर्ती चौक मार्ग वापरण्याचे आवाहन करण्यात आले आहे.

प्रशासनाचे आवाहन

पोलिस प्रशासनाने नागरिकांना मिरवणुकीदरम्यान गर्दीच्या मार्गांवर वाहनांचा वापर टाळावा, पर्यायी मार्गांचा वापर करावा, तसेच बॅरिकेडिंग व ‘नो-पार्किंग’ नियमांचे पालन करावे, असे आवाहन केले आहे. आपत्कालीन सेवांना मोकळा मार्ग उपलब्ध करून देण्याची जबाबदारी नागरिकांनी पार पाडावी, असेही प्रशासनाने स्पष्ट केले आहे.

> हे वाहतूक बदल मिरवणूक संपेपर्यंत लागू राहतील. परिस्थितीनुसार वाहतुकीत आणखी बदल होऊ शकतात. नागरिकांनी वाहतूक पोलिसांच्या सूचनांकडे लक्ष देण्याचे आवाहनही करण्यात आले आहे.