महानगरपालिका निवडणूक : प्रारूप प्रभागरचनेला मंजुरी छत्रपती संभाजीनगर.

 

वृत्तरत्न नव महाराष्ट्र न्यूज✍🏻

रितेश साबळे .औरंगाबाद

छत्रपती संभाजीनगर – येथील महानगरपालिका निवडणुकीच्या पार्श्वभूमीवर महत्त्वाचा निर्णय घेत, राज्य निवडणूक आयोगाने प्रारूप प्रभागरचनेला मंजुरी दिली आहे. या रचनेनुसार संपूर्ण शहराचे एकूण २९ प्रभाग निश्चित करण्यात आले आहेत.

या प्रभागांची आखणी करताना लोकसंख्या, भौगोलिक रचना आणि आरक्षणाचा विचार करण्यात आला आहे. शहरातील वाढत्या लोकसंख्येच्या पार्श्वभूमीवर काही भागात नवीन प्रभाग निर्माण झाले आहेत, तर काही जुन्या प्रभागांचे पुनर्विभाजन करण्यात आले आहे.

राज्य निवडणूक आयोगाच्या आदेशानुसार, नागरिकांना ४ सप्टेंबर २०२५ पर्यंत या प्रारूप रचनेवर हरकती व सूचना नोंदवण्याची संधी देण्यात आली आहे. या मुदतीनंतर प्राप्त झालेल्या सर्व हरकतींचा आढावा घेऊन अंतिम प्रभागरचना जाहीर केली जाईल.

यासोबतच, अंतिम प्रभागरचनेनंतर महिलांसह अनुसूचित जाती-जमाती, इतर मागासवर्गीयांसाठीचे आरक्षण जाहीर करण्यात येईल. त्यानंतर निवडणुकीची अधिकृत अधिसूचना जाहीर करून निवडणूक प्रक्रिया सुरू होईल.

या निर्णयामुळे राजकीय वातावरण पुन्हा एकदा तापण्याची शक्यता आहे. विविध राजकीय पक्ष आपल्या गणिताचा फेरआढावा घेत आहेत. अनेक ठिकाणी आरक्षणाचा प्रश्न निर्माण होणार असल्यामुळे स्थानिक स्तरावर गट-तटबाजीही वाढण्याची चिन्हे आहेत.

शहरातील नागरिक, सामाजिक संस्था आणि पक्षनिष्ठ कार्यकर्त्यांकडून या प्रभागरचनेवर प्रतिक्रिया उमटू लागल्या आहेत. काही ठिकाणी प्रभाग मोठा असल्याची, तर काही ठिकाणी कृत्रिम विभागणी झाल्याची टीका होत आहे.

तथापि, निवडणूक आयोगाने स्पष्ट केले आहे की अंतिम प्रभागरचना ही सर्व हरकतींचा विचार करूनच निश्चित केली जाईल.

- यानंतर छत्रपती संभाजीनगर महानगरपालिका निवडणुकीसाठी अंतिम उलटगणती सुरू होणार असून, सप्टेंबरनंतरच निवडणुकीचे वेळापत्रक घोषित होण्याची शक्यता आहे.