मुंबई क्राईम ब्रँचचा मोठा भंडाफोड — मानव तस्करीचा रॅकेट उघड; बनावट लग्न दाखल्याद्वारे महिला परदेशात पाठवण्याचा प्रयत्न!

वृत्तरत्न नव महाराष्ट्र न्यूज✍🏻

कार्यकारी संपादक : रितेश साबळे

मुंबई — मुंबई क्राईम ब्रँचच्या प्रॉपर्टी सेलने छत्रपती शिवाजी महाराज आंतरराष्ट्रीय विमानतळावर एका मोठ्या मानव तस्करीच्या रॅकेटचा पर्दाफाश केला आहे. या प्रकरणात पोलिसांनी विजयकुमार (वय 43) या एजंटला आणि कमलजीत कौर (वय 28) या महिलेला अटक केली असून, कमलजीत कौरला पोलिसांनी तात्काळ सुरक्षित स्थळी हलवून मदत पुरवली आहे.

तपासानुसार विजयकुमारने कमलजीतला परदेशात पाठवण्याचे आमिष दाखवले होते. त्यासाठी त्याने तिच्यासोबत खोटे लग्न दाखवून बनावट विवाह प्रमाणपत्र तयार केले, आणि त्या आधारे दोघे नेदरलँड्समधील एम्स्टर्डॅमकडे जाणार होते. मात्र, विमानतळावरील इमिग्रेशन अधिकाऱ्यांनी कागदपत्रांची तपासणी केली असता विवाह प्रमाणपत्र खोटे असल्याचे उघड झाले.

पुढील तपासात विजयकुमारने कमलजीतकडून २५ लाख रुपयांची मागणी केली असून त्यापैकी ५ लाख रुपये आधीच घेतल्याचे समोर आले आहे. या व्यवहाराच्या आधारे पोलिसांनी त्याच्यावर फसवणूक, विश्वासघात आणि मानवनिर्वाह प्रतिबंधक कायद्यान्वये गुन्हा दाखल केला आहे.

या रॅकेटचा उगम पंजाबमधील एका गुरजीत सिंग या व्यक्तीकडून झाला असल्याची माहिती मिळाली आहे. त्यानेच विजयकुमार आणि कमलजीत यांची ओळख करून दिली होती. क्राईम ब्रँच सध्या या नेटवर्कमधील इतर सदस्यांचा शोध घेत असून, मानव तस्करीच्या या प्रकाराचा परदेशातील गुन्हेगारी टोळ्यांशी संबंध आहे का हेही तपासले जात आहे.

सहार पोलीस स्टेशन आणि क्राईम ब्रँचचा प्रॉपर्टी सेल मिळून तपास करत असून, आरोपीच्या आर्थिक व्यवहारांबाबत व परदेश प्रवासाच्या नोंदींबाबत माहिती घेतली जात आहे. पोलीस सूत्रांनी सांगितले की, इमिग्रेशन कर्मचाऱ्यांच्या सतर्कतेमुळे हे संपूर्ण रॅकेट उघडकीस आले.

मुंबई पोलिसांनी नागरिकांना आवाहन केले आहे की, परदेश प्रवासासाठी कोणत्याही एजंटकडून लालच दाखवणाऱ्या ऑफर स्वीकारू नका, आणि नेहमी अधिकृत सरकारी किंवा दूतावासांच्या माध्यमातूनच व्हिसा व प्रवासाची प्रक्रिया पूर्ण करा.