बालमजुरीवर धडक कारवाई; दोन कारखान्यांमधून १२ अल्पवयीनांची सुटका

 

वृत्तरत्न नव महाराष्ट्र न्यूज✍️

कार्यकारी संपादक : रितेश साबळे

छत्रपती संभाजीनगर – जिल्ह्यात बालमजुरीविरोधात सुरू असलेल्या विशेष मोहिमेमध्ये कामगार विभाग व पोलिसांनी संयुक्त कारवाई करून वाळूज औद्योगिक परिसरातील दोन कारखान्यांमधून तब्बल १२ अल्पवयीन मुलांची सुटका केली. कारखानदारांकडून बेकायदेशीरपणे काम करून घेतल्याची माहिती मिळाल्यानंतर ही कारवाई करण्यात आली.

कारवाईदरम्यान तपास दलाने पाहिले असता, काही मुले १४ वर्षांखालील असून, धोकादायक यंत्रणेजवळ काम करीत असल्याचे आढळले. यावेळी मुलांची त्वरित सुटका करून त्यांना बालकल्याण समितीच्या ताब्यात देण्यात आले आहे. तसेच कारखान्यांमध्ये कामाच्या जागेची स्वच्छता, सुरक्षा उपाययोजना आणि कामगार नोंदीबाबत गंभीर त्रुटी असल्याचेही तपासात स्पष्ट झाले.

कामगार विभागाने दोन्ही कारखानदारांविरोधात किशोर न्याय अधिनियम व बालमजुरी प्रतिबंधक कायद्यांतर्गत गुन्हे नोंदवले असून, पुढील तपास सुरू आहे. जिल्हा प्रशासनाने कठोर भाषेत इशारा देत सांगितले की, “बालमजुरीला छत्रपती संभाजीनगर जिल्ह्यात कोणतीही मुभा दिली जाणार नाही. दोषींवर कडक कारवाईच होईल.”

सुटका करण्यात आलेल्या मुलांची समुपदेशन प्रक्रिया सुरू असून, त्यांना सुरक्षित वातावरणात नेण्यात आले आहे. जिल्ह्यात आणखी कोठेही बालमजुरीचे प्रकरण असल्यास तात्काळ कळवावे, असे आवाहन प्रशासनाने नागरिकांना केले आहे.