पुढील दोन वर्षांत राज्यात १ लाख २० हजार सरकारी नोकऱ्या; मुख्यमंत्री देवेंद्र फडणवीस यांची मोठी घोषणा

वृत्तरत्न नव महाराष्ट्र न्यूज

मुंबई | प्रतिनिधी-शंकर गायकवाड

राज्यातील तरुणांसाठी दिलासादायक बातमी असून, पुढील दोन वर्षांच्या कालावधीत १ लाख २० हजार सरकारी नोकऱ्या उपलब्ध करून देण्याचा निर्धार मुख्यमंत्री देवेंद्र फडणवीस यांनी व्यक्त केला आहे. राज्यातील बेरोजगारी कमी करणे आणि युवकांना अधिकाधिक रोजगाराच्या संधी उपलब्ध करून देणे हा सरकारचा मुख्य उद्देश असल्याचे त्यांनी स्पष्ट केले.

मुख्यमंत्री फडणवीस म्हणाले की, प्रशासकीय कार्यक्षमता वाढवणे, सेवा वितरण अधिक गतिमान करणे आणि युवकांना सक्षम करणे या त्रिसूत्रीवर सरकार काम करत आहे. त्याच पार्श्वभूमीवर विविध शासकीय विभागांतील रिक्त पदे नियोजनबद्ध पद्धतीने भरण्यात येणार आहेत.

या भरती प्रक्रियेमध्ये शिक्षण, आरोग्य, पोलीस, महसूल, सार्वजनिक बांधकाम, नगरविकास यांसह अनेक महत्त्वाच्या विभागांमध्ये मोठ्या प्रमाणावर पदभरती होण्याची शक्यता आहे. भरती प्रक्रिया अधिक वेगाने राबवली जाईल, असेही मुख्यमंत्री यांनी सांगितले.

सरकारी नोकऱ्यांच्या भरती प्रक्रियेत पारदर्शकता राखली जाईल, ऑनलाईन पद्धतीचा अधिकाधिक वापर केला जाईल तसेच गुणवत्ताधारित निवड सुनिश्चित केली जाईल, असे मुख्यमंत्री फडणवीस यांनी नमूद केले.

या निर्णयामुळे राज्यातील लाखो बेरोजगार तरुणांना मोठा दिलासा मिळणार असून, रोजगारनिर्मितीला चालना मिळेल, असा विश्वास व्यक्त केला जात आहे. या घोषणेकडे तरुण वर्गाचे विशेष लक्ष लागले असून, लवकरच अधिकृत जाहिराती आणि भरतीचे वेळापत्रक जाहीर होण्याची अपेक्षा आहे.