बेपत्ता जीएसटी अधिकाऱ्याचा कारमध्ये आढळला मृतदेह; बीडमध्ये खळबळ, मृत्यू संशयाच्या भोवऱ्यात

 

वृत्तरत्न नव महाराष्ट्र न्यूज

कार्यकारी संपादक : रितेश साबळे

बीड : बीड जिल्ह्यातून एक धक्कादायक आणि गंभीर घटना समोर आली असून, काही तासांपासून बेपत्ता असलेल्या जीएसटी विभागातील अधिकाऱ्याचा मृतदेह त्यांच्या स्वतःच्या कारमध्ये आढळून आला आहे. या घटनेमुळे संपूर्ण जिल्ह्यात खळबळ उडाली असून, मृत्यूमागील नेमके कारण अद्याप अस्पष्ट आहे.

मिळालेल्या माहितीनुसार, बीड येथे कार्यरत असलेले जीएसटी अधिकारी सचिन जाधव हे शुक्रवारी अचानक बेपत्ता झाले होते. बराच वेळ संपर्क न झाल्याने त्यांच्या कुटुंबीयांनी शिवाजीनगर पोलीस ठाण्यात बेपत्ता झाल्याची तक्रार दाखल केली होती. त्यानंतर पोलीस प्रशासनाने तात्काळ शोधमोहीम सुरू केली.

शनिवारी दुपारी सोलापूर–धुळे महामार्गालगत एका निर्जनस्थळी उभी असलेली त्यांची कार आढळून आली. तपास केला असता, कारमध्येच अधिकाऱ्याचा मृतदेह आढळल्याने एकच खळबळ उडाली. घटनेची माहिती मिळताच पोलीस अधिकारी घटनास्थळी दाखल झाले आणि पंचनामा करण्यात आला.

प्राथमिक तपासात मृत्यू नैसर्गिक आहे की आत्महत्या अथवा घातपाताचा प्रकार आहे, याबाबत कोणताही ठोस निष्कर्ष निघालेला नाही. मृतदेह शवविच्छेदनासाठी पाठवण्यात आला असून, अहवालानंतरच मृत्यूचे नेमके कारण स्पष्ट होणार आहे, असे पोलीस सूत्रांनी सांगितले.

दरम्यान, एका जबाबदार शासकीय अधिकाऱ्याचा अशा संशयास्पद परिस्थितीत मृत्यू झाल्याने अनेक तर्क-वितर्क लावले जात आहेत. या प्रकरणाचा सखोल आणि निष्पक्ष तपास करण्याची मागणी नागरिकांकडून होत आहे. पोलीस सर्व बाजूंनी तपास करत असून, मृत अधिकाऱ्याच्या शेवटच्या हालचाली, कॉल डिटेल्स आणि कार्यालयीन पार्श्वभूमीचीही चौकशी सुरू आहे.