*वसमत मध्ये बँक मॅनेजरला लुटणाऱ्या टोळीची पोलिसांनी भर रस्त्यातून काढली वरात*

 

प्रतिनिधी - मोहन दिपके 

हिंगोली जिल्ह्यातील वसमत येथे काही दिवसांपूर्वी भरदिवसा बँक मॅनेजरला लुटणाऱ्या आंतरराज्यीय टोळीच्या मुसक्या आवळण्यात पोलिसांना मोठे यश आले आहे. विशेष म्हणजे, गुन्हेगारांवर वचक बसावा यासाठी पोलिसांनी या आरोपींची वसमत शहराच्या भररस्त्यातून धिंड (वरात) काढली. पोलिसांच्या या 'सिंघम' स्टाईल कारवाईचे सर्वस्तरातून कौतुक होत आहे.

नेमकी घटना काय होती?

९ जानेवारी रोजी वसमत तालुक्यातील कोर्टा पाटी परिसरात ही खळबळजनक घटना घडली होती. परभणी जिल्हा मध्यवर्ती सहकारी बँकेच्या चोंढी शाखेचे मॅनेजर ज्ञानोबा भोसले हे ८ लाख रुपयांची रोकड घेऊन दुचाकीवरून जात होते. दरम्यान, एका बोलेरो पिकअप गाडीने त्यांच्या दुचाकीला जोराची धडक दिली. मॅनेजर खाली पडताच, अपघाताचा बनाव करत आरोपींनी त्यांच्या हातातील पैशांची बॅग हिसकावून पोबारा केला होता. भरदिवसा घडलेल्या या 'फिल्मी स्टाईल' लुटमारीमुळे व्यापारी आणि नागरिकांमध्ये भीतीचे वातावरण निर्माण झाले होते.

आंध्रातून आवळल्या मुसक्या:

घटनेचे गांभीर्य ओळखून पोलीस अधीक्षक निलाभ रोहन यांनी स्थानिक गुन्हे शाखा (LCB) आणि कुरुंदा पोलिसांची विविध पथके तपासासाठी रवाना केली होती. तांत्रिक तपासाच्या आधारे या गुन्ह्याचे धागेदोरे आंध्र प्रदेशपर्यंत पोहोचले. पोलिसांनी मोठ्या शिताफीने आंध्र प्रदेशातील बापटला जिल्ह्यातून आणि इतर ठिकाणांवरून एकूण ९ आरोपींना अटक केली. त्यांच्याकडून ६ लाख ७० हजार रुपयांची रोकड आणि गुन्ह्यात वापरलेली वाहने असा एकूण २० लाखांचा मुद्देमाल जप्त करण्यात आला आहे.

भररस्त्यातून काढली 'वरात':

आरोपींना अटक करून वसमतमध्ये आणल्यानंतर, पोलिसांनी त्यांची शहरातून 'वरात' काढली. "गुन्हेगारी खपवून घेतली जाणार नाही," हा कडक संदेश देण्यासाठीच पोलिसांनी हे पाऊल उचलल्याचे बोलले जात आहे. यावेळी बघ्यांनी मोठी गर्दी केली होती. ज्या गुन्हेगारांनी शहरात दहशत निर्माण करण्याचा प्रयत्न केला, त्यांचीच मान खाली घालून पोलिसांनी धिंड काढल्याने नागरिकांमधील पोलिसांप्रती विश्वास वाढला आहे.