छत्रपती संभाजीनगर महानगरपालिकेत महापौर पदासाठी प्रचंड सस्पेन्स; राजकीय हालचालींना वेग

वृत्तरत्न नव महाराष्ट्र न्यूज

कार्यकारी संपादक रितेश साबळे

छत्रपती संभाजीनगर 

महानगरपालिकेच्या महापौर पदाच्या निवडीकडे संपूर्ण शहराचे लक्ष लागले असून सध्या राजकीय वातावरण चांगलेच तापले आहे. संख्याबळ स्पष्ट नसल्याने आणि विविध पक्षांमध्ये अंतर्गत मतभेद असल्यामुळे महापौर कोण होणार, याबाबत मोठा सस्पेन्स निर्माण झाला आहे. शेवटच्या क्षणापर्यंत समीकरणे बदलण्याची शक्यता असल्याने सर्वच पक्ष सतर्क भूमिकेत आहेत.

महापौर पद खुल्या प्रवर्गासाठी असले तरी या निवडीत ओबीसी व अपक्ष नगरसेवकांची भूमिका निर्णायक ठरण्याची शक्यता वर्तवली जात आहे. कोणत्याही एका पक्षाला स्पष्ट बहुमत नसल्याने पाठिंबा मिळवण्यासाठी राजकीय हालचालींना वेग आला आहे. बैठका, चर्चासत्रे आणि अंतर्गत सल्लामसलत सुरू असून संभाव्य उमेदवारांची नावे गोपनीय ठेवण्यात येत आहेत.

भाजप, काँग्रेस, शिवसेना तसेच इतर घटक पक्षांकडून रणनीती आखली जात असून, ऐनवेळी आकडेमोड बदलू शकते, असे राजकीय जाणकारांचे मत आहे. काही नगरसेवकांनी अद्याप आपली भूमिका स्पष्ट न केल्यामुळे सस्पेन्स अधिकच वाढला आहे. त्यामुळे महापौर पदासाठी शेवटच्या क्षणापर्यंत अनिश्चितता कायम राहण्याची चिन्हे दिसत आहेत.

दरम्यान, शहराच्या विकासकामांना गती देण्यासाठी सक्षम आणि स्थिर नेतृत्वाची आवश्यकता असल्याची भावना नागरिकांमधून व्यक्त होत आहे. पाणीपुरवठा, रस्ते, कचरा व्यवस्थापन, वाहतूक आणि नागरी सुविधा यांसारख्या प्रश्नांवर ठोस निर्णय घेणारा महापौर मिळावा, अशी अपेक्षा नागरिक व्यक्त करत आहेत.

आता सर्वांचे लक्ष महापौर निवडीच्या दिवशी होणाऱ्या मतदानाकडे लागले असून, राजकीय गणिते नेमकी कशी जुळतात आणि अखेर शहराच्या पहिल्या नागरिकपदाचा मान कोणाच्या गळ्यात पडतो, हे पाहणे औत्सुक्याचे ठरणार आहे.