🏆 जिल्हा परिषद शाळा बौध्दपाडा लोकनृत्य स्पर्धेत अव्वल!

 

शहापूर | प्रतिनिधी-आनंदा भालेराव 

दिनांक 27 फेब्रुवारी 2026 रोजी महाराष्ट्र नवनिर्माण सेना शहापूर तालुका वतीने आयोजित मराठी भाषा गौरव दिना निमित्त भव्य खुल्या मराठी राज लोकनृत्य स्पर्धा उत्साहात पार पडली. या स्पर्धेत जिल्हा परिषद शाळा बौध्दपाडा येथील चिमुकल्या बालकलाकारांनी आपल्या अप्रतिम कलाविष्काराने प्रथम क्रमांक पटकावत शाळेच्या नावाला मानाचा तुरा खोवला.

स्पर्धेत विद्यार्थ्यांनी सादर केलेल्या लोकनृत्यातून मराठी संस्कृतीचा ठसा उमटला. ताल, लय आणि पारंपरिक वेशभूषेचा संगम साधत त्यांनी उपस्थितांची मने जिंकली. “परिश्रमाची फुले उमलली, यशाची झाली आरस; बौध्दपाडा शाळेच्या नावाचा दरवळला सुगंध खास” असे वातावरण या यशानंतर निर्माण झाले.

या यशामागे शाळेचे गुरुवर्य आयु. जाधव सर व आयु. वाकचौरे सर यांचे मार्गदर्शन व विद्यार्थ्यांची मेहनत महत्त्वाची ठरली. शाळेतील अष्टपैलू विद्यार्थ्यांच्या कलाविष्कारामुळे हा क्षण खास ठरला असून परिसरातून सर्वत्र अभिनंदनाचा वर्षाव होत आहे.

मराठी भाषा गौरव दिनाच्या निमित्ताने झालेल्या या स्पर्धेत बौध्दपाडा शाळेने इतिहास रचत आपला ठसा उमटवला आहे. 🌸