मदतीच्या बहाण्याने तरुणीला बापगावात नेल्याचा आरोप; माजी आमदार नरेंद्र पवार यांच्यासह दोघांविरोधात गुन्हा.

प्रतिनिधी - मनोहर गायकवाड 

भिवंडी : पतीसोबत सुरू असलेल्या वादावर तोडगा काढण्यासाठी मदत करण्याच्या बहाण्याने २२ वर्षीय विवाहित महिलेला कार्यालयात बोलावून भिवंडी तालुक्यातील बापगाव येथे नेण्यात आले आणि तेथे तिच्यावर अत्याचार केल्याचा आरोप करण्यात आला आहे. या प्रकरणी भाजपचे माजी आमदार नरेंद्र पवार आणि बडतर्फ पोलिस कर्मचारी शैलेश पाटील यांच्याविरोधात पडघा पोलिस ठाण्यात गुन्हा दाखल करण्यात आला आहे. 

मध्यस्थीच्या नावाखाली बोलावल्याचा आरोप

पोलिसांकडे दाखल करण्यात आलेल्या तक्रारीनुसार, संबंधित तरुणीचा पतीसोबत वाद सुरू होता. हा वाद मिटवण्यासाठी मध्यस्थी करण्याच्या उद्देशाने तिला कल्याण येथील कार्यालयात बोलावण्यात आल्याचे तक्रारीत नमूद आहे. त्यानंतर १३ सप्टेंबर रोजी तिला भिवंडी तालुक्यातील बापगाव येथील खासगी मालमत्तेवर नेण्यात आल्याचा आरोप आहे.

तेथे शस्त्राचा धाक दाखवून मद्य पाजण्यात आले आणि तिच्यावर लैंगिक अत्याचार करण्यात आल्याचे महिलेने तक्रारीत म्हटले आहे. रात्रीच्या सुमारास नरेंद्र पवार तेथून निघून गेल्यानंतर शैलेश पाटील यानेही तिच्यावर अत्याचार केल्याचा आरोप तक्रारीत करण्यात आला आहे.

घटनेनंतर नगरसेविकेकडे मदतीची मागणी

घटनेनंतर घाबरलेल्या महिलेने १६ सप्टेंबर रोजी काँग्रेस नगरसेविका कांचन कुलकर्णी यांच्याशी संपर्क साधून मदत मागितल्याचे वृत्त आहे. पीडितेने आपल्याकडे घटनेशी संबंधित काही व्हिडिओ आणि मोबाईलवरील व्हॉट्सॲप चॅट असल्याचे दाखविल्याचे कुलकर्णी यांनी सांगितले.

यानंतर कांचन कुलकर्णी या संबंधित महिलेला सोबत घेऊन पडघा पोलिस ठाण्यात पोहोचल्या. पोलिसांनी तक्रारीची पडताळणी केल्यानंतर नरेंद्र पवार आणि शैलेश पाटील यांच्याविरोधात गुन्हा नोंदवला. 

४८ तासांत अटक न झाल्यास आंदोलनाचा इशारा

या प्रकरणातील आरोपींवर कारवाई करण्याची मागणी कांचन कुलकर्णी यांनी केली आहे. आरोपींना ४८ तासांत अटक न झाल्यास महिलांना सोबत घेऊन पडघा पोलिस ठाण्याबाहेर आंदोलन करण्याचा इशारा त्यांनी दिल्याचे वृत्त आहे.

दरम्यान, या प्रकरणातील आरोपांची पोलिसांकडून चौकशी सुरू असून, गुन्हा दाखल होणे हे आरोप सिद्ध झाल्याचे द्योतक नाही. पुढील तपास आणि न्यायालयीन प्रक्रियेत प्रकरणातील तथ्य स्पष्ट होणार आहेत.