*गोकुळ दूध संघाच्या सत्तासंघर्षाचे पडसाद संगमनेरमध्ये; राहुल गांधी समर्थक संघटनेचा आंदोलनाला पाठिंबा*

प्रतिनिधी : -तेजस घोसाळे, 

संगमनेर - कोल्हापूर जिल्ह्यातील गोकुळ दूध संघाच्या सत्तासंघर्षाने आता राजकीय वर्तुळातही मोठी चर्चा निर्माण केली आहे. दूध संघाच्या कारभारात शासनाचा हस्तक्षेप वाढत असल्याचा आरोप करत सुरू झालेल्या विरोधाला आता संगमनेरमधूनही पाठबळ मिळत आहे. राहुल गांधी समर्थक संघाच्या कार्यकर्त्यांनी या आंदोलनाला जाहीर समर्थन दिले आहे.

कोल्हापूरच्या सहकार क्षेत्रातील महत्त्वाची संस्था म्हणून ओळखल्या जाणाऱ्या गोकुळ दूध संघाच्या संचालक मंडळाच्या रचनेवरून सध्या वाद निर्माण झाला आहे. माजी मंत्री सतेज ऊर्फ बंटी पाटील यांच्या नेतृत्वाखालील पॅनेलने मागील निवडणुकीत २५ पैकी १३ जागांवर विजय मिळवत बहुमत प्राप्त केले होते. मात्र, शासनाकडून चार नवीन नामनिर्देशित सदस्य नियुक्त करण्याच्या निर्णयामुळे या बहुमताच्या समीकरणावर परिणाम होण्याची शक्यता व्यक्त केली जात आहे.

या निर्णयामुळे सहकार क्षेत्रातील लोकशाही प्रक्रियेवर प्रश्नचिन्ह उपस्थित होत असल्याची भूमिका आंदोलकांनी मांडली आहे. निवडून आलेल्या प्रतिनिधींच्या अधिकारांवर गदा आणण्याचा प्रयत्न होत असल्याचा आरोपही करण्यात येत आहे.

या पार्श्वभूमीवर कोल्हापूरमध्ये आंदोलनाची तीव्रता वाढत असून, ९ नोव्हेंबर रोजी निघालेल्या जनआंदोलनाचा आवाज संगमनेरपर्यंत पोहोचला आहे. संगमनेरमधील राहुल गांधी समर्थक संघाने सतेज पाटील यांच्या भूमिकेला पाठिंबा दर्शवत आंदोलनात सक्रिय सहभाग नोंदवण्याची भूमिका घेतली आहे.

दरम्यान, या संपूर्ण प्रकरणावरून राज्यातील सत्ताधारी आणि विरोधकांमध्ये आरोप-प्रत्यारोप सुरू झाले आहेत. सहकारी संस्थांच्या स्वायत्ततेचा मुद्दा पुन्हा एकदा ऐरणीवर आला असून, शासनाच्या निर्णयाविरोधात विविध स्तरांतून नाराजी व्यक्त केली जात आहे.

संगमनेरमध्ये झालेल्या चर्चेत राहुल गांधी समर्थक संघाचे प्रवीण हारे, सतीश खताळ, रवींद्र हारे, प्रतीक कोकणे, सचिन बाळे, राम अगरडे, अरुण चव्हाण, शंतनू भालेकर, प्रकाश कडलग, मोहसीन शेख आणि अमोल शेलकर यांच्यासह इतर पदाधिकारी व कार्यकर्ते उपस्थित असल्याचे सांगण्यात आले.

गोकुळ दूध संघाचा हा वाद आता केवळ कोल्हापूरपुरता मर्यादित न राहता राज्यातील सहकार आणि राजकारणातील महत्त्वाचा विषय बनत चालला आहे. शासनाच्या निर्णयावर पुढे काय भूमिका घेतली जाते आणि आंदोलनाला कोणते वळण मिळते, याकडे सर्वांचे लक्ष लागले आहे.